Heb 2 | NdeIBE | STEP | Ngakho kufanele siqaphelisise lokho esikuzwileyo, ukuze singaduki.

Hebrews 2

Isixwayiso ukuba kunanzelelwe

1 Ngakho kufanele siqaphelisise lokho esikuzwileyo, ukuze singaduki. 2 Ngoba uma ilizwi elakhulunywa yizingilosi liqinisa, njalo konke ukona lokungalaleli kuthole isijeziso sakho esifaneleyo, 3 pho thina sizaphepha njani uma singanaki insindiso enkulu kangaka na? Ukusindiswa lokhu, okwabikwa kuqala yiNkosi, kwafakazwa kithi yilabo abayizwayo.

4 LoNkulunkulu wakufakaza ngezibonakaliso, langezimanga, langezimangaliso ezahlukeneyo, langezipho zikaMoya oNgcwele ezabiwa ngokwentando yakhe.

UJesu wenziwa waba njengabafowabo

5 Akusikho kuzingilosi abeka ngaphansi kwazo ilizwe elizayo, esikhuluma ngalo. 6 Kodwa ikhona indawo lapho omunye ofakaza khona esithi: “Umuntu uyini ukuba ukhathazeke ngaye, loba indodana yomuntu ukuba uyinanze na?

7 Wamenza waba mncinyazana kulezingilosi; wambeka umqhele wobukhosi lodumo,

8 wabeka lezinto zonke ngaphansi kwezinyawo zakhe.” Ekubekeni izinto zonke ngaphansi kwakhe, uNkulunkulu katshiyanga lutho olungekho ngaphansi kwakhe. Kodwa khathesi kasiboni zinto zonke zingaphansi kwakhe. 9 Kodwa sibona uJesu, owenziwa waba ngaphansanyana kwezingilosi, ebekwa umqhele wobukhosi lodumo, ngokuba wavuma ukufa ukuze kuthi ngomusa kaNkulunkulu ezwe ukufa ngenxa yabantu bonke.

10 Ekuletheni amadodana amanengi enkazimulweni, kwakufanele ukuba uNkulunkulu, yena ozinto zonke zikhona ngenxa yakhe langaye, enze uMsunguli wokusindiswa kwabo aphelele ngokuhlupheka.

11 Ngoba lowo owenza abantu babe ngcwele kanye lalabo abenziwe baba ngcwele ngabendlunye. Ngakho uJesu kakumyangisi ukuba athi bangabafowabo.

12 Uthi, “Ngizamemezela ibizo lakho kubafowethu; ngizahlabelela udumo lwakho phambi kwebandla.”

13 Njalo uthi, “Ngizabeka ithemba lami kuye.” Uphinda athi, “Ngikhona lapha, kanye labantwana uNkulunkulu angiphe bona.”

14 Njengoba abantwana belomzimba legazi, laye wahlanganyela ebuntwini babo ukuze kuthi ngokufa kwakhe amchithe lowo ophethe amandla okufa – okutsho uSathane –

15 abakhulule ababebambeke ebugqilini impilo yabo yonke ngenxa yokwesaba kwabo ukufa.

16 Ngoba impela akusizingilosi azisizayo, kodwa inzalo ka-Abhrahama. 17 Ngenxa yalokhu kwakumele enziwe afane labafowabo kukho konke, ukuze abe ngumphristi omkhulu olesihawu lothembekileyo enkonzweni kaNkulunkulu, lokuba abe yinhlawulo yezono zabantu. 18 Njengoba laye wahlupheka lapho elingwa, uyanelisa ukubasiza abalingwayo.